محمد فهمي
كان اول مرة اشوف فيها مينا في قاعة المؤاتمرات في مؤتمر مصر الاول عرفت مينا من وصف الناس له ومكلمنهوش بس بصت له كتير كنت باتفرج على مناضل سمعت عنه كتير بالذات اللي عمله في جمعة الغضب.
يوم جمعة الغضب 28 يناير مينا كان في حلوان كان مسئول قيادة مسيرة لميدان التحرير من جامع كبير هناك راح قبل الصلاة ملاقاش حد من النشطاء قرر انه يبدأ الهتاف بعد الصلاة من خارج الجامع بس خاف لال الناس متتجاوبش معاه فقرر الدخول للجامع سمع الخطبة و صلى “صلاة الجمعة” وبعد الصلاة استنى حد يهتف ويبدا المسيرة محدش هتف مينا رفع ايده وهتف “الله اكبر” وخرج مينا بمسيرة من الجامع.
الحكاية دي اتحاكتلي يوم 12 ابريل فالتحرير وانا مكنتش مصدق و ضحكت صاحبي قالي مينا ايده كلها صلبان تحت صوابعه الحمدلله اني محدش خد باله سألته هوا ازاي عرف يصلي صلاة المسلمين قالي يا عم مينا متعود مينا يصلي في اي مكان.
كان ليا الشرف واتعرفت على مينا يوم ما رجعت من العمرة و روحت ميدان التحرير ( فجر 11 يوليو) حسين البدري صاحبي واقرب اصدقاء مينا في الفترة الاخيرة هوا اللي عرفني عليه شفت وشه اللي دايما بيضحك صافية محدش عارف سببها وسهرت معاه كذا مرة في الميدان في اعتصام 8 يوليو وسمعت منه لاقيته حد مثقف وبيفهم وبيعرف يتكلم كويس ويوضح موقفه ومبدأه في جملة واحدة ساعات كتير بتكون جملة لاديب عالمي لما ضيفته على الفيسبوك لاقيته حاطط المهنة كهربائي سليسيون كنت فاكره مش شاغل اصلان و بيهزر (قلت الدماغ الجامدة دي صعب انه يكون كهربائي) طلع فعلا شغال كهربائي وكان يعتصم معانا فالميدان ويركب اول مترو الصبح من التحرير و يروح بيته ينام ساعة واحدة بس و ينزل شغله الساعة 8.
لما حصل اشتباك بين المعتصمين في الميدان والبياعين اللي فالميدان بعد ما بياع ضرب معتصم بسنجة في رجله والبياعين حاجاتهم اتكسروا مينا مقالش دول ولاد كلب و وهما الغلطانين و يستاهلوا مينا قعد يواسي بياع تمر على حاجته اللي اتكسرت ومسابوش غير لما الراجل هدي
مينا كان مصري قبل ميكون مسيحي وانسان قبل كل شئ
لما سموه جيفارا مصر فيتا صاحبه الانتيم قال لم اجد شخص يتكلم عن الفقراء اكثر من مينا
دلوقتي انا باخاف اعرف حد نقي زي مينا اخاف لا الموت يخطفه و اتصدم تاني
حسين صرخ و قال ليه مينا بس اللي يموت في سبيل الوطن مش دا وطننا كلنا وطن ولاد الكلب و بتوع الكنبة ليه مينا واللي زيه هما اللي يدفعوا ضريبة الوطن
على راي امل دنقل
والودعاء الطيّبون
هم الذين يرثون الأرض في نهاية المدى
اما احنا اللي بنقول لا
من قال ” لا “.. فلم يمت ,
وظلّ روحا أبديّة الألم !
تشيرتي اللي عليه دمه هيفضل معايا بحالته ذكرى تفكرني ان كان في فعلا بشر انقياء
الوداع يا صديقي المناضل في جنة الخلد وفي قلوبنا الى الابد
المجد لمينا دانيا وكل شهداء الحرية